شيوخ الهانة جاو بحذانا

من ابرز ما ربحناه مالحكومة النهضاوية منذ توليها مقاليد السلطة:

:

ـ الزواج العرفي: الي هو حسب وزيرة النساوين (مع احترام للمرأة التونسية اما الوزيرة طلعت راجل في مخها) حرية  شخصية و يبعد عالفساد (خاطرو مقبول شرعا) و كاينهم معادش بش يفرقو علينا الPréservatifs

في حملات التوعية بش يفرقو اوراق زواج.....خاطر الڨحط بزايد و البوس من غير محبة يڨطع الشفايف
 

ـ شهايد و ديپلومات في اختصاصات اسلامية و توأمة الزيتونة مع الازهر خاطرهم من اهداف الثورة المجيدة

تبارك الله عندنا علماء في كل مقهى من تونس نفركسو في اختصاصات جديدة، سوق الشغل ناقصة حملة الشهائد الاسلامية و الباقي الكل بين النازا و اليابان و الصين و روسيا .... اولويات يا ولدي اولويات

بش يشرفنا نتقاسموا زلعات المشيخة مع كل العالم العربي و نرجعو امة مستكة وحدة و نعيشوا نحبو بعضنا كرز و فقراء

- ملتحين و ملتحيات و منقبين و منقبات و سلاح في سوق ليبيا و جماعات و تورابورا الجاية في بوڨرنين..... و السلفية التكفيرية الي تكفر فينا كل يوم لين ولى التربريب اكثر من صباح الخير..... السلفية العلمية الي هوايتهم الجهاد ضد العلم و كل اشكال المعرفة السليمة الخارجة عن سرب السلف الصالح متاع 1هجري!

ـ ندوات و منتديات و محاضرات شيوخ الوهابية (من هيفاء وهبي الكلو تفاهات و بيعان الهوا) في كل شبر من تونس! ما فهمتش شكون الي جابهم؟ جايين ينفخولنا فيهم هاو ختان بنات و بول البعير و شيطان و جواري و عورات و زبوب و هرمونات و ڨحط و وبنة خاطيتنا و مش متاعنا جايبين الدعاة الي ارصدتهم في البنوك الاسلامية (خاطرها بلاش ربى يا زبي) أكثر من حساناتهم، يتفرهدوا في تونس بلدهم التاني، يبيعوا شوية دموع تماسيح على زوز آيات و طرف احاديث ضعيفة السند بش لعباد تنقص شوية مالاحساس بالذنب و البعد على ربهم الاعلى و يبداو يسمسروا في الحسنات و السيئات حاطين هدفهم الاعظم نصرت الاسلام و الفوز بالجواري..... ريق بارد خاطر الشعب جاهل من كل النواحي اول واحد بش يجي يفلم عليه بريق التوبة و الدين الصحيح و التكفير و التكبير بش يصدقو و يتبعو مغمض عينيه ! !
الحاصل الاتجاه واضح، مظاهرات و مسيرات مضادة و يتلها الشعب في الاسلام و التاسلم و التسليم بالامر و البحث عن المنكر..... 

و الزوالي في الثلج غارق و البطال مازال بارك و الحكومة فيها كان الفم الحارك و فلوس البلاد الي ماخذينها سلف قاعد تتصرف عالتلف و دقان لحناك، وين اهداف الثورة المزعومة؟ متخبية تحت برنوس لحكومة؟