واحد مالتوانسة

موافق منافق نوع من أنواع متاع تونسة صرف، يتعايش في كنف الروح الرياضية مع الناس الي  يحب فرد جمعية...!!

انسان خدام و مسالم، معرس و عندو 4 صغار و كاري عندو 10 سنين، همو في الدنيا الفاتورات و فلوس الإيتود و خلاص الكريديات... شهار و يخدم كان في النهار و ديما يمشي مخر اما قبل المدير.... ما طالب من الدنيا كان يعيش و ما يحبش يربي الريش... يحب ولادو يكبروا فسع و يدبورا خدمة و يصرفوا عليه.... قد ما يحشاوهولوا يستحلى! زادو في الإسانس ما يحسهمش خاطر ماعندوش كرهبة... زادوا في الشراب مساليش حتى هو بلية كلبة و يحب يبطلو... زادوا في الخضرة و في الحليب و في كل شي .. مسالش الكرش مقلقيتوا و خايف لا يولي عندو الدم ولا سكر ...!! هاو زادوهم في الشهاري حكاية فارغة اما بازيد باكو دخان الي حتى هو ماشي و يغلى اما ربي يخلي دخان الدزيري... الموافق عايش لا حس لا خبر ما عندوش راي في السياسة و الدين و المعامع الفارغة .. آش دخلوا فيهم!

 كي تدور عليه الايام يولي منافق ماعاجبوش لعجب اما قدام الامر الواقع ما يتكلمش يخبي في قلبو و يكشخ و كل شي ماشي ستة زيت  ... يبوس يدو وجه و قفاء.. كي يدخل بش يرقد تسمع كان التربريب و الكفر و مبعد يشهد و يرقد بش غدوة يصبح يخدم على عمر

لحرف .... تنجم تقول ما عندو ما يعمل و هذا مش نفاق.... صحيح! اما نفاقو يظهر كي يسألوه في التلفزة و لا الراديون :" العويشة مفرهدة حمد لله يا ربي ما ناقصين شي.." ولا قدام مسؤول و لا خبير :" ولاه ما عندي ما نقول حمد لله الخدمة متعبة اما العبد لازم يتعب و يحلل فلوسو... عرق جبينو حلالو..." 
قاري النقص في روحو :" آش بش نعمل ؟؟؟ هانا نعيشو بالي انجموا... و بره قلت مش عاجبني الوضع و لا إحتجيت!! آش بش يزيدني .... هاي الحكومة تخدم على روحها ... تو تتحسن لومور كان خلاوها ولاد لحرام...!!"