lundi 8 avril 2013

يوميات سلفي كلوشار (لو پورتري روبو)

إنك تكون سلفي في هالبلاد كيما إنك كنت معتمد في عهد الزين..! 
الناس الكل تغزرلك بإحترام و إحتراز، مش يحبوك اما يعرفوك و يعرفو خنارك و 
يعرفوا الي بش تخرالهم في كيوفهم.... دونك اخطنا من بالك.!


إنك تكون سلفي في تونس كيما إنك تكون ذبانة في كوري زواييل كي بك كي بلاش

 ..... اما بلاش خير ... على خاطرك تفكرنا الي البلاد خامجة و ريحتها فايحة و 
حسك ياسر و مضرتك اكثر من منفعتك .


إنك تكون سلفي في تونس حكاية ساهلة، برشا متستحقش علم كبير.... لحية و

 قميص و عرّاقية ... إي لو تور إجووي ! اما إنك تكون سلفي جهادي حكاية اخرى 
او بالاصح حكاك آخر جملة ! 

السلفي الجهادي هو الجار اكيلي كي يسمع كاس طاح في دارك يجي يجري يدق عليك الباب بش يسألك :"لاباس؟" 
اكيلي يحب يعرف الشقيقة و الرقيقة على امل انو يعاونك بش تنجح في حياتك ! اما مشكلتو انو ماهوش مستوعب حياتك و يعرف الي انت شطر كلامك معاه حشو و تتليف عيناني !!
رغم ذلك يجري عليك الفحوص اللازمة و هو آمن بالعطاء و لأن حب الناس هو 
اسمى القيم .... نختار نعبر عليه ب"الإنسان النم" : نفخ ثم نفخ و إستنفاخ


انك تكون سلفي في تونس هو إبتلاء بالغباء و داء الزبوبية و الهرمونات الذكورية

samedi 6 avril 2013

حكاية فارغة!




مش بش نحكي سِيَاسة .. بش نحكي بِالسْياسة ..!


قمت نلقى الدنيا ظلمة في عينيا .. مديت يدي مشعل "پريكيا" ..
 بش نشوف وين يحط ساقيا ..
ماريت كان حجر الثنية ..
في الشارع عرضتني طفلة .. تبسمت و غمزت على غفلة ..
 قلتلي محلاها قفلة .. و انا لابس مريول ..
تطلعش تحكي ع السروال ..
ما عليناش .. لحكاية ما تهمناش .. و تخميج المخ ما يوفاش ..
شبينا ما شلقناش .. الي الطفلة ما فماش ..
و الي مازلنا ما قمناش .. و التليفون مازال ما صوناش ..
الخدمة و ما خدمناش .. مالسكرة مصحيناش ..
العيشة خنقة .. في كل طريق زنقة .. 
و الغصة و الشرقة .. يا مالخبز يا مالمرقة .. 
علاش الكل تخمم في الحرقة .. ؟؟
كلام الليل مدهون بالندوة 
شتا و صيف و .. كتلة وصيف ! 
تعڨد .. فز .. ڨوم